گولسەل محەمەد پۆستێک لە ئەنجومەنی نوێنەرانی عێراق وەرگرت

گولسەل محەمەد پۆستی ڕاپۆرتەری ئەنجومەنی نوێنەرانی عێراقی پێدرا و ڕایگەیاند، "پابەندبوونم دووپات دەکەمەوە لە بەرگریکردن لە ماف و شایستە ڕەواکانی پێکهاتەی تورکمان بەوپەڕی دەستپاکی و بەرپرسیارێتییەوە".

ئەمڕۆ دووشەممە، ٥ـی کانوونی دووەمی ٢٠٢٥، گولسەل محەمەد، ئەندامی ئەنجومەنی نوێنەرانی عێراق ڕایگەیاند، سوپاس و پێزانینی دڵسۆزانە ئاراستەی سەرۆکایەتی ئەنجومەنی نوێنەران دەکەم بۆ متمانەی ئەوان، هەروەها سوپاسی ئەندام پەرلەمانانی تورکمانیش دەکەم بۆ پاڵپشتی و پشتیوانیکردنی، دوابەدوای ڕەزامەندی فەرمی بۆ دەستنیشانکردنی من وەک ڕاپۆرتەری ئەنجومەنی نوێنەرانی عێراق.

ئاماژەی بەوەشکرد، پابەندبوونم دووپات دەکەمەوە کە بەردەوام بم لە کارکردن بە پەرۆشەوە بۆ خزمەتکردنی گەلی عێراق بە گشتی، و بەرگریکردن لە ماف و شایستە ڕەواکانی پێکهاتەی تورکمان بەوپەڕی دەستپاکی و بەرپرسیارێتییەوە.

ئەرکەکانی ڕاپۆرتەری ئەنجومەنی نوێنەران:

نووسینەوەی کۆنووسەکان: تۆمارکردنی هەموو ئەو قسانەی لە دانیشتنەکاندا دەکرێن و ئامادەکردنی کۆنووسی فەرمی دانیشتنەکە.

بەڕێوەبردنی دەنگدان: چاودێریکردنی پڕۆسەی دەنگدان لەسەر یاساکان و ژماردنی دەنگەکان بە وردی.

ئامادەکردنی کارنامە: هاوکاریکردنی سەرۆکایەتی پەرلەمان بۆ ڕێکخستنی خشتەی کارەکانی دانیشتنەکان.

تۆمارکردنی ئامادەنەبوون: ناونووسکردنی ئەو پەرلەمانتارانەی لە دانیشتنەکاندا ئامادە نین یان دواکەوتوون.

خوێندنەوەی ڕاپۆرتەکان: خوێندنەوەی دەقی یاساکان یان ئەو ڕاپۆرتانەی کە پێویستە لە کاتی دانیشتنەکەدا پێشکەش بکرێن.

پاراستنی بەڵگەنامەکان: سەرپەرشتیکردنی هەموو ئەو بەڵگەنامە و نووسراوە فەرمییانەی کە لە ناو پەرلەماندا دەردەچن.